Albularya kung tawagin si Tesalonica Nakpil. Nanggagamot ito gamit ang baso, langis, kandila at mga halamang gamot. Iyon ay sa tulong ng mga kaibigan nitong puting duwende na pinamumunuan ni Galay. 
Isa namang alagad ng medisina si Aidan Villegas. Gamit ang kaaalamang nakuha nito mula sa pag-aaral sa loob ng maraming taon ay marami na rin itong napagaling. Dahil doon, para dito ay walang karapatang manggamot ang isang taong walang lisensiya tulad ng albularyang si Tessa. 
Ano kaya ang posibleng mangyari kung magsanga ang landas ng dalawang taong may mahigpit na paniniwala sa kanilang mga sari-sariling kakayahan? At kung makikigulo pa si Melusina aka Luna na may sarili din nitong misyon, matahimik pa kaya ang mundo ng dalawang ito?

“Sinabi ko nang hindi nga ako ang may gawa niyan! Dahil kung ako, hindi kita titiran ng balat na walang pantal! Lahat iyan, buong katawan mo hanggang anit ay lalagyan ko ng butlig para hindi ka na makapagyabang tulad ngayon!”